أكرمنى الله بتنفيذ سقايه مياه للأرانب لا تحتاج إلى إعاده الملئ
يتم توصيلها إلى مصدر المياه زى أى حنفيه وتسيبها مع نفسها
وكل ما تفضى تتملى تانى لوحدها من غير ما تتدخل فى أى شئ
والفكره بسيطه جدا وأى واحد ممكن يعملها فى البيت
المطلوب
جردل مياه ـ محبس شطاف ـ لىّ ـ ماكينه سيفون من النوع الجانبى
جردل المياه بيكون عندك وباقى الخامات بتشتريها من أى محل أدوات صحيه
بيتم تركيب محبس الشطاف مكان الحنفيه وبيخرج منه اللّى ويتوصل مباشره فى ماكينه السيفون
والفكره هى نفسها فكره السيفون أو صندوق الطرد بتاع الحمامات الأفرنجى
صندوق الطرد كل ما المياه تفضى منه بترجع تتملى تانى لوحدها من غير ما حد يملاها
ودى مهمه الماكينه اللى بتحتفظ بمستوى مياه ثابت وانت موصل الماكينه على خط المياه مباشره عن طريق محبس الشطاف
وفى السقايه بتاعتنا كل ما الأرانب تستهلك ميه وتنقص من الجردل ترجع تتملى تانى
ولما توصل لمستوى ثابت فى الجردل ماكينه السيفون هاتقفل المياه لحد ما تستهلك الأرانب المياه مره تانيه وهكذا
ودى صور موضحه الفكره على الطبيعه
دى صوره محبس الشطاف متوصل بالماكينه عن طريق اللّى والماكينه بتتركب عن طريق عمل فتحه
فى جانب الجردل وتتربط بصاموله بتيجى مع الماكينه
ودى صوره الجردل وهو متركب فيه الماكينه من جوه
التكلفه العامه
الماكينه بـ 10 جنيه
المحبس بـ 6 جنيه
اللّى بـ 10 جنيه تقريبا
يعنى تقريبا 26 جنيه
فوائد الفكره
1ـ أكبر وأقرب فايده من الفكره هى تحقيق عنصر مهم جدا من عناصر المشروع التجارى
وهو تحقيق أكبر قدر من الأرباح بأقل قدر من المجهود
طبعا ملئ السقايه مش مجهود كبير بس هو برضه مجهود ووقت اتوفروا .
2ـ امكانيه تشغيل كل البطاريات على سقايه واحده حتى لو عندك مزرعه كبيره
وده برضه فيه توفير للتكاليف وللمجهود .
3ـ من الفوايد الجميله للسقايه دى إنك هاتشرب الأرانب من ماء جارى متجدد
على عكس السقايات التقليديه اللى ممكن يفضل فيها الماء 3 ايام على ما تفضى وتملاها مره تانيه
ملاحظات
* إحنا بنستعمل ماكينه السيفون اللى بتتركب من الجنب مش من أسفل لأنك ممكن تستعملها مع أى عبوه
وتعملها سقايه حتى لو كانت 1000 لتر أما اللى بتتركب فى السيفون من تحت هاتكون محكوم بكميه مياه محدده
لحد ارتفاع الماكينه فقط
* المحبس ليه مهمتين
الأولى / إن لو الماكينه عطلت لا قدر الله هاتقدر تقفل المحبس وتعالج العطل أو حتى تغير الماكينه
الثانيه / لو احتجت انك تنزل أملاح أو أدويه فى المياه مفيش أى مشكله اقفل المحبس والسقايه مليانه ونزل الدوا فى المياه
وبعد ما السقايه تفضى اغسلها من مكان الدوا وافتح المحبس تانى
يارب أكون قدرت أوصل الفكره
ويارب وتكون مفيده لكل اللى يجربها
عبدالسلام عزتالسبت نوفمبر 30, 2013 5:16 pm