حكـــــــاوى هــــــــاوى ـــــــــــــ الحلقة الخامسة ــــــــــ د/ shehata2020

السلام عليكم ورحمة الله وبركاته

اهلا بيكم فى الحلقة الخامسة من برنامج ـــــ حكـــاوى هــــاوى ـــــ ضيفنا وضيفكم النهارده مشرف اقسام الارانب رجل ذو خلق كريم ويحب روح التعاون والمودة

هو طبيب المنتدى بس طبيب بشرى طبيب صاعد نتمنى له التوفيق فى حياته المهنية من تقدم الى تقدم أن شاء الكريم

ضيفنا وضيفكم ****د/ shehata2020 ***

ان شاء الله تعجبكم الحلقة متبخلوش علينا بتعليقاتكم واقتراحاتكم

وجزاكم الله خيرا

بداية اهلا بيك يا د / shehata2020  لو تسمحلنا نتعرف على حضرتك اكتر وعلى بداية قصة عشقك للارانب واقتراحات حضرنك لتطوير الهواية فى مصر وكذلك تطوير المنتدى من خلال الاسئلة القادمة:

1. الاسم السن العنوان المهنة؟


محمد على شحاته 25 سنة من قرية الأشمونين مركز ملوى محافظة المنيا وانا طبيب امتياز بمستشفى سوزان مبارك للنسا و التوليد والأطفال بجامعة المنيا
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

2. كلمنا عن بدايتك مع هواية تربية الارانب؟

كنت عملت قبل كده مشروع توزيع خدمة الانترنت وبصراحة كده لقيت ان 75 % من المشتركين بيوصلوا علشان الأفلام الاباحية ولما سألت فى الموضوع ده ناس قالت لأ انت ملكش ذنب وناس قالت مكسب النت حرام ولما سألت صديق لى متدين أشار عليا بمشروع الأرانب وكمان كان فى رجل دين على قناة الرحمة شكر جدا فى المشروع ده فتوكلت على الله و نويت التربية
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

3. اول مكان ربيت فيه الارانب كان بطاريات ولا كان مكان عادى ارضى ؟ ولو ارضى كلمنا عن مواصفات المكان من حيث ازاى قدرت تسيطر على نضافة العلف والمايه وخلافه من مشاكل التربية الارضية؟

أول مكان هو بطاريات مستعملة وفضلت أكحت فيهم بالصنفرة لما طلعت عينى علشان أزيل الصدأ و بعد كده اديتهم برايمر علشان يطول فى عمرهم ان شاء الله
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

4. بدات تربية بكام ارنب؟

بدأت ب 12 أم و 3 ذكور
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

5. اول ارنبة ولدت عندك كام ؟

أول أرنبة ولدت عندى كانوا 7 أرانب منهم واحد ميت وكان فى الصيف الحمد لله
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

6. اكتر ارنب اتعلقت بيه ومش ناسيه لحد دلوقت ؟
أكتر أرنب اتعلقت بيه :
بصراحة هما اتنين مش واحد
الأول : أنثى و كنت مسميها مريم على اسم أختى الصغيرة و مازالت عندى فى دور الانتاج كانت رشيقة بتاكل كويس و بتزيد بشكل معقول
الثانى : عاشور ههههههههه وده ذكر هاى بلس اشتريته قريب من الأستاذ محمد طويلة ومش عارف ليه متعلق بيه بس انا بحبه
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&


7. اول مرض واجهته فى تربية الارانب ؟ واتصرفت معاه ازاى ؟

أول مرض مش فاكر بالظبط يمكن كان البرد ( مادة تشبه الجيلى ) و اختلط عليا الأمر و افتكرته التهاب رحم والحمد لله خف بالجنتاميسين ومش عارف بقى كان برد ولا التهاب رحم بس غالبا كان برد لأن الأرنبة كانت بكر
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

8. اكتر مشكلة واجهتك فى تربية الارانب؟


أكبر مشكلة هما اتنين :
الصرف وأعتقد كلنا بنعانى من الموضوع ده و خصوصا المبتدئين اللى زى حالاتى
وكمان التهاب العين : أنثى عندها التهاب فى العين من حوالى 5 شهور جربت معاها كل حاجة ومش نافع فيها حاجة و فى الآخر سبتها وهى بتاكل كويس
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

9. فى البدايات كنت بتاكل الارانب ايه؟


من البداية وانا بأكل الأرانب علف و أحيانا بطاطا بس كده
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&
10. تجربتك مع الاعلاف ؟ كلنا عانينا الكتير مع الاعلاف.


انا جربت كذا نوع وكل الأعلاف التجارية المشهورة زى بعض يعنى انا جربت المرشدى و مكة و الراعى كلهم زى بعض لكن علف المؤسسة الاسلامية ده حاجة تانية خالص
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&
11. كلمنا عن اول مرة بعت فيها ارانب من انتاجك؟


أول انتاج كانوا خمس أرانب مات واحد و دبحت واحد للبيت و أهديت 3 أرانب والحمد لله
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

12. كيف تعرفت على المنتدى؟؟

تعرفت على المنتدى من خلال جوجل والحمد لله معرفة طيبة و جميلة جدا
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

13. ماتتمنى ان تراه فى المنتدى؟

هو جميل قوى كده أعضاء و مشرفين و ادارة و زوار
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

14. اقتراحاتك لتطوير تربية الارانب فى مصر؟

عشان تطور أى حاجة فى أى مكان لازم تشجع الاقبال عليها يعنى تخلى الناس تهتم بيها وعلشان تتحكم فى الناس لازم تعرف اهتمامتهم
وهتمام أى شخص فى الدنيا هو الربح وبناء عليه لو عايز أطور تربية الأرانب فى مصر لازم أوسع الفجوة اللى بين تكلفة العلف و سعر الكيلو
بالنسبة للعلف : تأسيبس مصانع حكومية لتركيب العلف - تقليل نسبة الجمارك التى تفرض على مكونات العلف المستوردة - عمل شبكة مواصلات تابعة للدولة لتنمية الصعيد
بالنسبة لسعر الكيلو : الغاء الوسيط ( التاجر ) و انشاء أماكن للذبح فى جميع المحافظات
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

15. راى حضرتك فى تطبيق اساليب التربية الاجنبية فى مصر من حيث الرعاية والتغذية وخلافه واستيراد سلالات من الخارج. ؟

ياريت يبقى فى اشراف اجبارى لمزارع الأرانب الكبيرة لضمان تطبيق الأساليب الأجنبية فى التربية مع توفير الأدوات اللازمة لذلك فى السوق المصرية
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&

16. كلمة توجهها لاعضاء المنتدى؟

احب اشكر كل اعضاء المنتدى واتمنى المحبة تدوم بيننا جزاكم الله خيرا
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&