ولاننى كنت من هولاء قمت بعمل الحسابات والبحث اولا قبل التحويل .. والخص الامر كالتالى
افترض انك مشترك على سرعة 512 احسب استهلاكك على حسب سرعتك
اولا سرعة التحميل لديك تكون متوسط 50 كيلو بايت / ثانية وهذا القياس طبعا لنعرف اقصى حدود استهلاكك حسب السرعة المذكورة
50 كيلو * 60 ثانية * 60 دقيقة = 180000 كيلو ÷ 1000 = 180 ميجا فى الساعة .. اذن اقصى استهلاك ليك فى الساعة 180 ميجا
اذن لو انت مشغل جهاز الكمبيوتر بشكل متواصل تحميل فقط لمدة 17 ساعة فى اليوم تكون النتيجة كالتالى
180 ميجا * 17 ساعة = 3060 ميجا ÷ 1000 = 3 جيجا و .06 ميجا وهذا الناتج افتراضيا انك مشغل الكمبيوتر 17 ساعة يوميا باقصى حدود تسمح بها سرعتك سواء تحميل او مشاهدة مقاطع فيديو
3.06 جيجا * 30 يوم = 91 جيجا شهريا
طبعا حتى لو معاك مشتركين على نفس الخط عمرك ما هتتخطى النسبة دى لان سرعة التحميل هتقل وتنقسم عليكم يعنى اقسم السرعة على عدد المشتركين
طبعا سرعة التصفح والتحميل على سرعة 512 بالكاد معقولة لشخص واحد
ــــــــــــــــــــــــــ
قبل ما نتكلم على سرعة واحد ميجا اليكم بعض الحسابات وهى الاستهلاك بالميجا بايت فى الساعة
الحسابات دى واقعية
الاستهلاك بالنسبة للتصفح = 10 ميجا / ساعة
اللعب على الانترنت = 30 ميجا / ساعة
مقطع الفيديو الواحد حسب الجودة يعنى كمثال
( جودة فوق المتوسط لمقطع ساعتين ) = 600 ميجا ..
يعنى متوسط 300 ميجا للساعة للمشاهدة او لتحميل مقطع مدتة ساعة
ــــــــــــــــــــــــــــ
افترض انك مشترك على سرعة 1 ميجا احسب استهلاكك على حسب سرعتك
لا داعى لاعادة الحسابات فقط نذكر النتائج لان سرعتك فى التحميل هتكون وصلت لمتوسط 100 كيلو بايت / ثانية
لان التحميل اللى كان ( 3 جيجا و .06 ميجا ) بيستغرق على سرعة 512 فترة 17 ساعة تقدر تحملة فى 8.5 ساعة
يبقى كدة انت وفرت فى استهلاك الكهرباء واستهلاك جهاز الكمبيوتر وبقى معاك سرعة الضعف
يعنى لو بتحمل كل يوم العاب او مقاطع او قاعد تتفرج على اليوتيوب لمدة 8.5 ساعة كل يوم يبقى استهلاكك الشهرى 91 جيجا
وكمان عشان تخلص الباقة بتاعك باقى 9 جيجا
يعنى لو بتتصفح كمان كل يوم 30 ساعة بخلاف التحميل
10 ميجا / ساعة * 30 ساعة يوميا * 30 يوم = 9000 ميجا يعنى = 9 جيجا
طبعا دة على افتراض ان هناك 3 جهاز بيشتغل 10 ساعة تصفح يوميا
اذن سرعة 1 ميجا المحدودة ( 100 جيجا شهريا ) ممتازة للاستعمال فوق المتوسط
ــــــــــــــــــــــــــــ
واقعيا
طيب هل فى حد جرب سرعة 1 ميجا محدودة وقام بمتابعة استهلاكة الشهرى ( على موقع الشركة مقدمة الخدمة )
نعم هناك ناس قامت بمتابعة استهلاكها بشكل يومى وفى نهاية الشهر وجدت ان استهلاكها الشهرى متوسطة ( 35 جيجا فقط )
على اساس 3 جهاز على نفس الشبكة
ــــــــــــــــــــــــــ
اذن النتيجة
بالنسبة لاى استهلاك طبيعى وفوق المتوسط سرعة 1 ميجا ممتازة
بالنسبة للناس اللى مشغلة الكمبيوتر تحميل اكثر من 8.5 ساعة بشكل يومى .. غير مناسبة
ــــــــــــــــــــــ
اذن النصيحة لو فى حد بيستخدم سرعة 512 ومش بيتعدى الاستهلاك المذكور غير فورا الى سرعة 1 ميجا وانت الرابح
ـــــــــــــــــــــــ
ملحوظة الحسابات المذكورة تم بنائها على عدد الساعات لاقصى سرعة تحميل وليس بناء على حجم الميجابايت للمقطع حيث ان هناك مقاطع تتجاوز الساعة الواحدة فيها (700 ميجا ) .. لذا الحسابات بالطريقة المذكورة افضل
وطبعا استهلاكك على سرعة واحد ميجا يكون كالتالى
100 كيلو بايت * 60 ثانية * 60 دقيقة = 360000 كيلو بايت ÷ 1000 = 360 ميجا / ساعة
اذن اقصى حدود التحميل ليك على اساس اقصى سرعة هى 360 ميجا / ساعة على اساس 1 ميجا
360 ميجا * 8.5 ساعة = 3060 ميجا ÷ 1000 = 3.06 جيجا * 30 يوم = 91.8 جيجا شهريا
ملحوظة
افتراضيا لو انت خلصت 100 جيجا قبل نهاية الشهر .. الانترنت مش بينقطع عنك بل بيظل شغال لكن على سرعة 256 حتى انتهاء الشهر .. لتعود السرعة كما كانت مع بداية الشهر الجديد
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ملحوظة : لازم عشان الباقة مش تخلص منك تراعى عدة نقاط
اولا : لازم تكون بتعرف تتعامل مع الراوتر وتكون مغير الباسوورد بتاعة(باسوورد الراوتر ودة غير باسوورد الوافاى) وتكون مشغل خاصية تحديد (الماك ادرس) المسموح لهم بالدخول .. عشان سهل ان اى حد ممكن يدخل من الهاتف على الراوتر ويعرف كلمة السر ويعمل اى حاجة .. والنتيجة ان الجيران كلهم هيستهلكوا من الباقة بتاعتك ودى معلومة اكيدة . وعندك على النت طرق التعامل مع اى راوتر ..
ثانيا : فى اجهزة عالية فى الاستهلاك عن غيرها مثل اجهزة هواوى .. او اجهزة مصابة بفيروسات ودى برضة بترفع بيانات باستمرار للهاكر .. تخيل ان كل فيديو او صورة او حتى الكاميرا بتاعة هاتفك شغالة باستمرار بترفع بياناتك للهاكر .
ثالثا : كلما ارتفت السرعة غالبا يزيد الاستهلاك .. لماذا .. كمثال انت لو على سرعة 512 وبتتفرج على فيديو على يوتيوب كم تكون جودة مشاهدة مقاطع الفيديو .. ممكن تكون بشكل اوتوماتيكى 144 او 240 .. لكن لما تنتقل الى سرعة 1 ميجا .. بشكل اوتوماتيكى الفيديو بيشتغل بجودة اعلى .. ربما 360 او 480 ـــــــــ طيب لو 4 ميجا .. بترفع بشكل اوتوماتيكى الى 720 او 1080 .. طبعا دة بيزود الاستهلاك .. وطبعا دى حلها فى ايدك ان انت تضبط جودة المشاهدة على حاجة وسط زى 480 مثلا ..
رابعا : كلما زاد عدد الاجهزة المتصلة على الخط زاد الاستهلاك .. ناس فاتحة بالنهار وناس فاتحة ليلا كذلك طبيعة المشترك فى ناس بتتصفح فقط وفى ناس قاعدة فاتحة يوتيوب طول الوقت وفى ناس ودول من الشباب الصغير عمال يحمل العاب طول الوقت .. كذلك فى ناس قاعدة فاضية زى الناس اللى فى اجازة مثلا والاستهلاك بيزيد احيانا فى شهر عن التانى زى شهر رمضان مثلا .. كذلك لو الكمبيوتر بة مشكلة ..
يعنى ناس بتحمل لعبة مثلا وبعد ما تخلص تحميل اللعبة مش تشتغل لان الكمبيوتر بة مشكلة او امكانياتة محدودة زى كارت شاشة اقل من المطلوب للعبة مثلا .. هنا بمسح اللعبة ويدور على غيرها ..
طبعا الموضوع دة قديم شوية .. لأن دلوقتى اقل سرعة على تى داتا او we حاليا هى 5 ميجا بسعر 125 جنية .. ولما تخلص الباقة بترجع لواحد ميجا .. طيب انت تفضل اية .. طبعا الطبيعى خالص ان لو انت عايز تنزل لعبة مساحتها مثلا 1 جيجا .. تفضل ان اللعبة تنزل فى 5 ساعات ونصف على سرعة 512.. ام تفضل ان اللعبة تنزل فى 3 ساعات الا ربع على سرعة 1 ميجا.. ولا تنزل فى 42 دقيقة على سرعة 4 ميجا .. ولا تنزل فى 33 دقيقة على سرعة 5 ميجا .. وخلى بالك دة غير الوقت اللى انت منتظر .. فى كهرباء مستهلكة بزيادة للكمبيوتر والشاشة دة غير العمر الافتراضى للاجهزة دى بينقص كتير ..
ــــــــــــــــــــــــــــــــــــ
بالنسبة للناس اللى اضافت تعليقات على مواقع التواصل ان 100 جيجا مش بتستحمل اسبوعين .. دى تجربة فعلية شخصية للتوضيح
سرعة 1 ميجا باقة 100 جيجا ( المصرية للاتصالات ) الاستهلاك فى اعلى حدودة 60 جيجا ..
سرعة 2 ميجا باقة 120 جيجا (شركة اتصالات ) الاستهلاك فى اعلى حدودة 75 جيجا ..
سرعة 4 ميجا باقة 150 جيجا ( اورانج ) الاستهلاك فى اعلى حدودة 135 جيجا ..
سرعة 5 ميجا باقة 100 جيجا ( المصرية للاتصالات - we ) لم ينتهى الشهر بعد ولكن حتى الان استهلكت 35 جيجا فى 10 يوم
طيب اية السبب الرئيسى واللى لاحظتة مؤخرا بعد التجربة ؟؟؟
قبل ذلك لما كان يبقى فى حد بيحمل ملف من النت او بيتفرج على فيديو بجودة عالية .. الباقيين على نفس الشبكة مش بيعرفوا يشغلوا حتى فيديو .. وكانت الحسابات التى تم ذكرها فى اول الموضوع واقعية ان انت مهما حاولت مش هتقدر تتخطى 180 ميجا فى الساعة على سرعة 512 انت وغيرك ..
لكن نيجى بقى لسرعة 5 ميجا .. ما شاء الله .. ممكن يتم استهلاك 2 جيجا فى ساعة و 6 دقائق .. يعنى ممكن يبقى فى حد بيحمل .. وغيرة بيتفرج على مقاطع فيديو .. وغيرة بيتصفح .. والنت شغال تمام ..
يعنى لو فى اكتر من شخص كأن كل واحد عندة خط نت لوحدة ..
الاول لو كنت تيجى تتفرج على فيديو .. وحد تانى بيتفرج او بيحمل مش تعرف .. وتضطر انك تتصفح اى حاجة لحد ما التانى يخلص ..
لكن دلوقتى ممكن تستهلك 23 جيجا فى اليوم الواحد عادى .. والسرعة بتساعدك انك تستهلك ..
صور تبين الامر .. تم دمج الصورتين .. الجزء الاولى تبين الاستهلاك فى فترة 10 يوم .. مع ملحوظة انة تم تخطى 35 جيجا لسبب تحميلى نسخة ويندوز 10 مزدوجة وبرامج كبيرة لصديق لأن السرعة عندة لا تسمح بذلك .. يعنى فى حوالى 10 جيجا مش استهلاكى العادى ودة فى 5 ساعات ..
والجزء الثانى يبين السرعة ببرنامج التحميل مع ملحوظة انة ممكن تقل عن كدة شوية او تزيد على حسب المستخدمين فى نفس الوقت
