صباح الخير يا شباب
الموضوع ده كان فى بالى من فترة انى اكتبه بس فى بوست للاخ محمد الصبرى هو اللى خلانى اخد القرار بكتابته
انا لاحظت من خلال المنتدى ان معظم الناس بتربى كميات ارانب قليلة مش كتيرة يعنى مثلا انا ما اعرفش اذا كان حد فى المنتدى عنده مزرعة 200 ام او اكتر انا عن نفسى اشرفت على مزارع 400 ام قبل كده
المهم
تكلفة العلف = 70 % تقريبا من اى مشروع انتاج حيوانى سواء كان ارانب او غيره و طبعا فى حالة المربيين الصغار بيتم تدمير تعبهم و شغلهم لما سعر العلف يزيد او المصنع يلعب فى التركيبة و دى بتحصل كتير
انا من رائى الحل فى التعاونيات الصغيرة بمعنى انا لاحظت ان فى ناس كتير فى الجروب من المنصورة الفكرة بقى ان 4 او 5 اعضاء من المنصورة يتفقوا مع بعض انهم يشتروا مكبس علف صغير انتاجيته حوالى 50 كيلو فى الساعة و يجمعوا مع بعض تمن العلف و يتفقوا على التركيبة و يعملوا علف خاص بيهم و على فكرة الموضوع مش صعب بس عايز اصرار و من ناحية تانية تمنه مش غالى من 4000 - 5000 جنيه مقارنة بالخساير اللى بتحصل لما العلف يزيد او تركيبته تتغير
و الموضوع محتاج ثقة و امانة لان اكيد طبعا الخامات و المكبس هاتكون عند واحد فيهم و على تركيبة العلف سهلة انا ممكن ادهالكم لو حبيتوا بس انكم كمربيين صغار تفضلوا تحت رحمة مصنعين الاعلاف الكبار يبقى مشاريعكم و تعبكم هايتحكم عليه بالفشل
افضل حل انكم تتعاونوا مع بعض لان محدش هيساعدكم غير نفسكم من ناحية تانية ده اللى حصل فى بلد زى اليابان زمان بعد ما امريكا ضربتها بالقنبلة الذرية و خسرت فى الحرب العالمية التانية اعتمدوا على التعاونيات الصغيرة انما تستنى ان العلف تمنه ينزل او تفتكر ان شركة العلف هاتديلك علف بسعر التكلفة يبقى بتحلم لانه لازم يكسب طبعا
و خلى بالكم مصانع العلف مش بيعمل علف ارانب و بس بيعمل اعلاف للسمك و النعام و ساعات المواشى و الفراخ كمان يعنى لو كل مزارع الارانب فى مصر قفلت مصنع العلف مش هايقفل هايوجه نشاطه لمزارع من نوع تانى
اتمنى اعرف رايكم فى الفكرة و اتمنى انكم تقولوا لى انكم طبقتوها شكرا
فى عده نقاط بتخلى الموضوع فيه شويه صعوبه
1ـ 90 % من المربين اللى على قد الحال زيى كده بيربوا كنوع من تحسين الدخل
يعنى فعليا مش فاضيين إنهم يتجمعوا ويتناقشوا ويقرروا ويجمعوا فلوس و....و....و....
وإسأل بليغ عن موضوع مزرعه الأرانب للجميع واسألنى أنا عن موضوع / مين جاى معايا المزرعه
والحمد لله الفكرتين ماتنفذوش
2ـ المربى الصغير بيفضل دايما الإختصار فى تكاليف التربيه
يعنى لو جنب البيت علف بـ 120 جنيه وبعيد عنه بشويه علف بـ 140 جنيه
هايقولك أنا لسه هاروح هناك وأتكلف مواصلات غير ان العلف غالى لا يا عم خلينى فى العلف ده احسن (يقصد الأرخص)
ما الناس بتأكل منه والدنيا ماشيه ده حتى لو كان علف تعبان ماكانش اتباع
3ـ أنا واثق فيك وإنت واثق فيا وإحنا الإثنين واثقين إن فى شيطان مش هايسكت
ولو الشيطان فشل فى انه يفرق بين اثنين مش هايفشل إنه يفرق بين 5 أو 6 افراد كل واحد فيهم دافع فلوس
وكل واحد فلوسه بتوجعه
4ـ فى رايى الشخصى غن الموضوع ده مش هايتم بالتعاون
ده هايتم بواحد جرئ متوفر عنده مكان يسمى بسم الله ويجيب المكبس ويبدأ الشغل ويصبر على المكسب
ومش هاخبى عليك انا فكرت فيها بس الفلوس !!!
ونفس الموضوع ده تم اقتراحه فى مسأله البيع
حتى فى موضوع كانت كاتباه ام عمر عن عمل نقاط تسويق فى كل محافظه
والمحصله ـ لا شئ ـ الغرض من الكلام مش الإحباط صدقنى
إنما أنا فقط أعرض عليك نقاط أنا شوفتها
وممكن أكون غلطان أو شايف حاجه من زاويه مختلفه
محمد طويلهالجمعة أبريل 12, 2013 2:06 pm