سامحونى فى العنوان الذى قد يبدوا صادما للبعض لكن هذا هو حالنا
دماغنا ناشفة
يدخل المربى المجال دون ان يحاول حتى الالتفات الى تجارب من سبقوه
لكى يستفيد من تجاربهم ويتجنب اخطائهم
اكتب هذا الموضوع بعد لقائى مع مربى ارانب قديم( نسبة الى قدم وسائله)
أقول له ابدا من حيث انتهى الاخرون ...
اقول له استخدم علف غالى الغالى تمنه فيه ........ يستخدم نوع زبالة وبعدين يشتكى من ضعف التحويل....ومن مشاكل العلف اياها
اقول له بلاش برسيم.. ولو لازم يبقى بكميات ضئيلة واحبس الخلفة فى البوكس لغاية ما الأم تنتهى من البرسيم... وبعدين افتح عليهم
البرسيم على اللخلفة بلاش منه احسن.... يقوللى ازااااى دة البرسيم ده كدة.... بيظبط المسائل ده انا جدى الله يرحمه مكانش بيأكل الابرسيم وكان مليونير............
اقول له طب امشى على جدول وقاية كويس يقوللى خليها على الله ... اللى نصيبه يعيش هيعيش واللى نصيبه يغور هيغور
الاقيه بيحقن الارنب باسنتى والسنتى ونص ايفوماك اقوله يا نهار اسود ده كدة كتتتتتير الجرعة دى تكفى لخمس ارانب كبيرة.. الارنب ممكن يموت منك بدون سبب ظاهرى
. يقوللى اتكلم كلام عاقلين
طب يا صاحبى بلاش عشار للارنبة فى نفس يوم الولادة ريحها شوية .. يقوللى ازاااااى دى حلاوتها وهى سخنة لسة.... يا عم هتسلسل منك . يقوللى والعشرة دى عندى نتاية من سنتين شغالة على الاسلوب دة.... طب والباقى..... يقوللى كل شىء بأوان
واللى مش بتعشر اهى الفتلة بتعمل احلى شغل... اقوللة الفتلة...؟؟ يقوللى وعامللى نفسك فاهم ارانب ... دى الفتلة دى من غيرها ازاى شغال... شكلك ما بتكلش كرانشى
طب بلاش تبيت النتاية مع الدكر ... كدة غلط ... يقوللى هوة انا فاضى ... يابنى دى تساهيل...وبعدين بفضل الله مفيش ارنبة بتفلت منى ...
اقوله ازاى... علمنى ...يقوللى ...كل 3 ايام ببيتها مع الدكر ....وبكدة العدد يضرب فى اتنين واحتمال العشار يزيد
يا عم الحج قول كلام غير كدة..... يعقد حواجبه ويقولى كل واحد له اسلوبه والظاهر ان مدرستك غير مدرستى فى التربية مش بقول لك انت مش بتاكل كرانشى
.... وعندك كام أم بقى .. يقوللى خمسة بس اية بمقام 50 ولا الدكر... ده كتيبة لوحده شغال معايا تلات سنين مبيقولش لا ابدا
ااااااااااااااااااااه
طب يا بنى انت ليه مش بتزود ... ما دام عندك خبرة طويلة كدة ساكت على نفسك ليه وقبل ما يرد يرن تليفونه.. يسمع المكالمة ووجه يحمر ويصفر وبعدين يقول نصيب ... محدش بياخد اكتر من نصيبه.... العين المرة دى كانت جامدة قوى ... أم فاروق دى ولية عنيها تفلق الحجر نصفين كان لازم ابخر الارانب ... كان لازم ابخر الارانب
الله يحرق ابو الارانب... على اللى يربيها تانى...
مشروع الارانب دة افشل مشروع على وجة الارض..
. كل مشروعات الارانب لم تكسب أو تربح وبتصفى
... ربنا ينتقم من اسلام سلام اللى رسم لى الطريق الوردى .. وخلانى ابيع اللى ورايا وادامى وابيع دهب المدام .. وأرهن بعد كدة المدام كمان... طلع فى الاخر صاحب مكتب من المكاتب اللى بتمص دم الغلابة... دة لا طلع مهندس زراعى ولا حاجة... دة طلع صاحب شركة البخور الفاسدة اللى بخرت بيها العنبر بتاعى اللى كان فيه خمسمائة أم وعلشان البخور مغشوشة أم فاروق حسدت المكان.
وبهذا انتهت اسطورة مربى ارانب قديم
ربنا يكفينا شر البخور الفاسدة .. والعقول الفاسدة...وسلملى على ام فاروق
هذه القصة من وحى خيالى.....وان كانت تتكرر كل يوم مع اختلاف الظروف
والاحوال
................................................................................................
معلش يا جماعة... انا زودت العيار شوية ... لكن طبعا انتو فاهمين انا عملت كدة لية
ياااارب تكون رسالتى وصلت
وبصراحه هذا الموضوع منقول ^^
أنا متأسف يا أستاذ أحمد
مضطر احذف جزء من العنوان
والموضوع هانقله لقسم اسره المنتدى
محمد طويلهالسبت يوليو 06, 2013 9:22 pm