السلام عليكم ورحمه الله وبركاته
مشكله التبريد والصيف الكل شاغل نفسه بيها من الآن حتى ان بعض الناس اشترت تكييفات من دلوقت
المهم إحنا (كمربيين) طبعا لأننا مستحيل نجيب تكييفات للأرانب لأنها بصرف النظر عن تكلفتها الإقتصاديه
لا تصلح فى مجال تربيه الأرانب التكييف علشان يكون فعال ومفيد لازم يكون فى مكان مقفول ولو قفلت المكان على الأرانب ده هايزود الأمونيا
ويكون على المربى اختيار أمر من أمرين إما إن الأرانب تموت من الحر أو تموت من الأمونيا !!!!!!!!!!
وأكيد مش ده اللى مطلوب ابدا
وكنت قلت قبل كده فى أكتر من مشاركة لى إنى عرفت من واحد فنى تبريد إن تشغيل شفاط قوى فى المكان
هايكون كافى جدا تخفيض درجه الحراره حتى لو كان الجو حر فى الخارج
المهم انا نفذت الفكره من يومين كانت درجه الحراره فى الخارج 30 درجه وداخل الشقه عندى 19 درجه شغلت شفاط المطبخ وقفلت كل الشبابيك ما عدا شباك واحد وقفلت الشقه على كده ورجعلتها بعد ساعتين على أمل انى ألاقى الكلام سليم وألاقى درجه الحراره نزلت
وفوجئت إن درجه الحراره أصبحت 21 درجه على عكس ما سمعت من فنى التبريد
المهم بحثت فى الموضوع تانى ولقيت إن كلامه سليم ولكنه مشروط بشرط إن درجه الحراره داخل المكان تكون أعلى من درجه الحراره فى الخارج
يعنى مثلا تكون درجه الحراره فى المكان 35 وفى الخارج 30 درجه وتشغيل الشفاط هايجدد الهواء ويعمل استطراق لدرجه الحراره
فتنزل الحراره فى الداخل لـ 32 درجه مثلا بعد ما كانت 35 درجه والدليل اللى يأكد المسأله دى كمان هو السيارات
اللى بتعتمد فى تبريد موتورها على الهواء وليس على رادياتير المياه واشهر سياره فى مجال تبريد الهواء هى العربيه
الفولكس موديل بيتل أو الخنفسة زى ما بنسميها فى مصر تبريد محرك السياره دى بيعتمد على توربينات هواء
تدفع الهواء باستمرار فى اتحاه المحرك فتخفض درجه حراره الموتور
بعد ما طولت عليكم إحنا كده عرفنا ان تخفيض درجه الحراره فى الصيف عن طريق الهواء فقط هى فكره كويسه وبس مشروطه بإن درجه
الحراره فى الداخل تكون اكبر من درجه الحراره فى الخارج وده مش متوفر فى 90% من أيام الصيف
ومش هايكون قدامنا غير التبريد عن طريق خلايا التبريد أو ورق التبريد حتى لو رفع نسبه الرطوبه فأكيد ده هايكون افضل من الحراره الشديده
والميزه الكبيره جدا فى ورق التبريد إنه بيحتاج مدخل للهواء متركب عليه ورق التريبد ومخرج للهواء متركب علشه شفاط لسحب الهواء
علشان يمر على الورق ويخرج بارد أو لطيف ومش زى المكيفات الفريون اللى بتحتاج مكان مغلق
المهم شوفوا الفيديو ده
[ندعوك للتسجيل في المنتدى أو التعريف بنفسك لمعاينة هذا الرابط]
ده إعلان عن خلايا التبريد واستخداماتها ونماذج مصنعه جاهزه للبيع بس الفكره نفسها قابله للتنفيذ بسهوله
ورق التبريد موجود فى محلات تجهيزات المزارع وسمعت انه موجود فى السبتيه باسعار كويسه بس ماشوفتش السبتيه بعينى
والمضخات موجوده إما مضخات حوض سمك (للأحجام الصغيره ) او مضخات غسالات للأحجام الكبيره
والتقفيل أى ورشه صاج محترمه ممكن تعمل ليك التقفيل بتاعها والشاسيه تعمله انت على ايدك يكون افضل طبعا
أما خزان المياه فأى جردل كبير شويه هايوفى الغرض المطلوب
وده فيديو تانى لمنوذج مصنع بشكل يدوى
[ندعوك للتسجيل في المنتدى أو التعريف بنفسك لمعاينة هذا الرابط]
وده نموذج تانى ابسط منه
[ندعوك للتسجيل في المنتدى أو التعريف بنفسك لمعاينة هذا الرابط]
إن شاء الله انا هحاول اعمل منها نموذج صغير ولو جاب نتيجه ايجابيه إن شاء الله
هابدا فى تنفيذها على كبير
طولت عليكم بس الموضوع يستحق الكلام فيه
منتدى الأرانب للجميع
أهلا وسهلا بك زائرنا الكريم ، في منتديات الأرانب للجميع .
المرجو منك أن تقوم بتسجـيل الدخول لتقوم بالمشاركة معنا. إن لم يكن لـديك حساب بعـد ، نتشرف بدعوتك لإنشائه بالتسجيل لديـنا . سنكون سعـداء جدا بانضمامك الي اسرة المنتدى . مع تحيات الإدارة
معلومات قيمة جدا علي فكرة في حاجات جاهزة من خلايا التبريد
ايضا في مكيفات بها خاصية ازاله الرطوبة في السيستم بتاعها نظام اسمة dry
ودي شفتها في كاريير وشارب..فمفيش مشاكل رطوبة ان شاء الله
osoالثلاثاء مارس 05, 2013 1:20 pm