أسعار وزن الأرنب المتعارف عليها

الارانب نوعين فى تصنيف البيع اما سلالة ودى مثلا بتبدء من 2.5 كيلو دى بتباع سلالة للتربية بمواصفات خاصة يعنى مواصفاتها بتكون مطابقة لشكل ونوع السلالة اللى المفروض انها منها ودى بتبقى مفروزة يعنى مثلا لو بوبيون بيبقى الارنب ابيض وبة بقع سوداء متساوية .. اما عن اللحم فهو غير مرتبط بمواصفات السلالة وممكن يكون بة مواصفات السلالة لكنة فائض عند المربى فبيطلعة لحم وهو عامة ممكن من كيلو حتى 2 كيلو تقريبا ويباع للاكل فقط يعنى اللى واخدة واخد ارنب للاكل مش للتربية وبذلك لا يسئل البائع

وعامة سعر الارنب اللحم من 20 الى 25 جنية على حسب الظروف والكمية لكن السلالة من 60 الى 200 تقريبا لكن اهم شئ المصدر الموثوق منة

يعني معني كدة إن سعر كيلو الأرنب الذي يتم شرائه للتربية من60 جنيه حتي 200 جنيه ؟؟؟؟؟؟؟

من 60 الى 200 او اكثر دى للسلالة بالقطعة يعنى بالارنب بدون النظر لوزنة .. لكن فى سلالات ممتازة بتباع بالكيلو لكن سعر الكيلو من 32 الى 60 جنية ايا يكن وزنها

متشكرين جداً علي إهتمام حضرتك ياأستاذ مصطفي كنت عايز أعرف إيه الأفضل سعر السلالة بالكيلو واللا بالأرنب وماهي كيفية معرفة أن سعر السلالة بالأرنب تستحق السعر المطلوب ومعرفة أن يكون وزنها مناسب للسعر؟

العفو استاذ محمود لكن افترض انى ببيع لك سلالة بالقطعة هل تعتقد انى اديلك افضل اناث عندى منتخبة سواء شغالة او جديدة لم تشتغل.. طبعا بدون مجاملات .. طيب لو عندى انتاج مثلا 50 ارنبة صغيرة وهانتخب عشرة منهم هل ساعطيك من تلك الارانب العشرة .. طيب لو انا انتخبت العشرة دول عندى ولقيت 5 منهم شغلهم مش عاجبنى طبعا هبيعهم لك سلالة بالقطعة .. ودة اكثر الشائع .. يبقى الموضوع كلة بيعتمد على شئ اساسى المصدر الموثوق منة .او مزرعة كل انتاجها شغل نضيف وعالى .. يبقى دايما خليك فى الاوزان الصغيرة يعنى متوسط كيلو ونص واشترى كمية مناسبة بالوزن وعرف صاحب المزرعة انك واخدهم تربية ومش مهم لو السعر عالى شوية عن ما تشترى لحم من المحل .. وبعدين لما يكبرو وتشغلهم انتخب انت منهم ومن سلالتهم .. دة بالنسبة للانواع المعروفة ولازم تبقى عندك خلفية عن المواصفات الشكلية والانتاجية لكل نوع على حدة وتكون تعرف تفحص الارنب من ناحية خلوة من الامراض يعنى مثلا مفيش اثار اسهال مفيش تصمغ فى الاذن مفيش جرب فى الاطراف مفيش انتفاخ ولازم يكون الارنب مطابق لمواصفات سلالتة من حيث الشكل . طيب لازم تدرس السوق برضة وعلى حسب معرفتى ان تقريبا كل الانواع متساوية فى سعر الوزن الا المميز فيها والقريب من الصفات الاصلية للنوع يعنى مثلا ممكن تلاقى ارنبة فلاندر عند مربى وزنها 3 كيلو مثلا وعند اخر 5 كيلو يبقى دى قريبة للبيور وتستحق الزيادة وخاصة لو انتاجهاعالى وتقوم بخدمتة على اكمل وجة وعند الفطام يكون الوزن جيد للخلفة   يبقى فاضل اذن السلالات اللى بتباع سلالة بالكيلو يعنى مثلا اللى هى الهاى بلاس اللى الكيلو فيها من 45 الى 60 وعن نفسى لسة ماجربتهاش ومعنى ذلك انك لو اخدتها كيلو يبقى مثلا ب60 طيب لو 2 كيلو يبقى ب 120 وهكذا لانها سلالة غالية وبتباع من صغرها على اساس سلالة بخلاف السلالات الاخرى اللى الكيلو فيها مثلا 25 يعن لو اتنين كيلو يبقى خمسين لكن لو ازيد صاحبها مش بيبيعها وزن فى الحالة دى لان النمو من فوق اتنين كيلو بيبقى بطئ شوية وبتاخد مساحة فى البطارية وممكن عشان انها بتتوقف عن النمو فى الوزن عند وزن محدد يعنى بتاكل ومش بتزيد لانها وصلت الحد الاقصى بتاعها وواقفة عن العمل والنمو بانتظار اكتمال العمر المناسب للتلقيح  وعلى حسب معرفتى من احد المربيين الفرق فى السلالات المعروفة عندنا وسلالة الهاى زى الفرق بالضبط بين الدجاج البلدى والدجاج الابيض يعنى البلدى مش محتاج رعاية اوى لكن الابيض محتاج رعاية اكتر والبلدى بيوصل وزن محدد عند فترة كبيرة نسبيا فيما ان الابيض بيوصل الوزن المحدد بسرعة واسمع ان الهاى وزن الخلفة عند الفطام ممكن يوصل لكيلو وعدد الخلفة متوسط 8 .. يعنى سلالة ربحية .. وكمان سرعة النمو عند الخلفة .. طيب دة الكلام اللى سمعتة لكن لسة ما جربتهوش .. يبقى اذن الحل فى ايدك انت اللى تحدد انت عايز اية ولو سألتنى اقولك جرب من دة ومن دة ويكون اوزان صغيرة للكل واول ما تجيبهم تحصنهم التسمم الدموى .. وتحرص على عدم وجود رطوبة فى المكان وتكون التهوية جيدة بس بدون مروحة .. خلاصة الكلام المصدر الموثوق منة سواء مزرعة او احد اعضاء المنتدى او مراكز بحوث انتاج الحيوان .. والله الموفق

جزاك اللـــــــه كل خيـــــــر ياأستـــــــــــــــاذ مصـــطــفــي

حاجة كمان نسيت اذكرها عند الشراء لازم تفحص ظهر الارنبة يعنى السلسلة لان الارنب الطبيعى ظهرة مش بيبان فية السلسلة الظهرية من كثافة اللحم ودة مؤشرة ان الارنب سليم لكن الارنب المريض او اللى طالع من دور مرض بتظهر السلسلة بشكل واضح عند تمرير اليد على ظهرة

ومعلومة جديدة عن الموضوع دة من الاستاذ محمد الشبراوى عرفتها لما اتصلت علية .. ان السلالات البيور النقية انتاجها وشغلها اعلى من الهاى بلاس لكن المشكلة مناعتها الضعيفة واذا تم تهجينها مع انواع اخرى ترتفع المناعة لكن انتاجها بيقل

مصطفى2 كتب:

ومعلومة جديدة عن الموضوع دة من الاستاذ محمد الشبراوى عرفتها لما اتصلت علية .. ان السلالات البيور النقية انتاجها وشغلها اعلى من الهاى بلاس لكن المشكلة مناعتها الضعيفة واذا تم تهجينها مع انواع اخرى ترتفع المناعة لكن انتاجها بيقل

كل نوع من الارانب ولة موطن اصلى يعيش فية ويتأقلم مع المكان وظروف المناخ الذى يعيش فية
وطبعا لما بيتم استيراد الارانب البيور دى من موطنها الاصلى لمصر بيكون الجيل الأول منها دة لسة متأقلمش مع المناخ المصرى والمفروض انك تهيئلة الجو المناسب وبعد كدة الاجيال التانية بتتأقلم مع المناخ الجديد زى الهاى بلس كدة

حاجة كمان مهمة حبيت اذكرها لانى وقعت فيها مؤخرا . اشتريت مجموعة ارانب اقل من 2 كيلو ولما روحت غطست جسمها بماء مضاف لة بيوتكس كنوع من التطهير قبل ادخالها عندى .. لكن بعد التصاق الشعر بالجسم ظهرت البطن واضحة منتفخة مثل الكورة الموضوعة بالبطن .. طبعا تخلصت منهم وعند الذبح كانت الغازات تملئ الامعاء .. والنصيحة عند الشراء يفضل الاوزان فوق 2 كيلو لانها بتكون اضمن من الاوزان الصغيرة وعبرت مرحلة الخطر .. ثانيا مراجعة حالة البطن من جميع الجوانب والارنب ذو القوام الممشوق افضل من ضخم البطن ..