بسم الله الذى يحكم بين عباده
وهو العزيز العليم
اصنع علفتك بنفسك ـ طريقه تصنيع العلف
وردتنى كثير من الأسئله من الزملاء من يسأل عن تركيبه علف ومن يسأل عن خلطه يصنعها يدويا
بدون ديباجه قد تطول أوتقصر أود الدخول فى الموضوع بشكل مباشر
كل الأسئله التى وردتنى على غرار
ـ عايز تركيبه علف يدويه
ـ ازاى اقدر اعمل علف
ـ عايز اعمل خلطه عندى فى البيت وأأكلها للأرانب
يعنى كل واحد عايز التركيبه او الخلطه
انا بقى هاكتب لك اللى احسن من التركيبه
وهو ازاى تقدر تحسبها وتحدد العناصر اللى انت محتاجها بنفسك
سبق قبل كده اتكلمت فى موضوع مطول عن العلف
هاتحتاج ترجعله للوصول الى الجداول التى بها تحليل عناصر العلف
[ندعوك للتسجيل في المنتدى أو التعريف بنفسك لمعاينة هذا الرابط]
بس لازم ارجع اذكر هايفضل العلف المصبع (المكبوس ) هو الافضل للتربيه
وفى نهايه الموضوع سنوضح الفارق بين قيمه الخلطات وقيمه العلف المكبوس
ندخل فى الموضوع
سيتم الشرح على مثال تطبيقى لتركيبه علف
(وهى تركيبه افتراضيه ليست حقيقيه ولا تصلح لتغذيه الأرانب)
300 كيلوا دريس حجازى
250 كيلوا كسب فول صويا
250 ذره صفراء
50 شعير
150 رده خشنه
ــــــــــــــــــــــــــــــــــــــــــ
1000 كيلوا
لو سالت واحد وأعطاك هذه التركيبه ازاى تعرف انه بيعطيك تركيبه سليمه ؟
علشان تعرف يبقى لازم تعرف طريقه حساب العناصر الموجوده فى التركيبه
يعنى مثلا
لحساب نسبه البروتين الموجوده فى التركيبه
يتم عن طريق اتباع الخطوات التاليه
أولا / يتم ضرب وزن كل عنصر من التركيبه × نسبه البروتين الخاصه بالعنصر
مثال ( 300 كيلوا دريس × 18 = 5400 )
ثانيا / يتم حساب كل عنصر من عناصر التركيبه بنفس الطريقه المحسوب بها الدريس كالآتى
250 صويا × 44 = 11000
250 ذره صفراء × 7.7 = 1925
50 شعير × 9.6 = 480
150 رده خشنه × 15 = 2250
ثالثا / بعد ان تم ضرب كل عنصر × نسبه البروتين المتواجد هبه
يتم جمع كل النواتج التى تم الحصول عليها
5400
+11000
+1925
+480
+2250
ــــــــــــــــــــــــــــــــــــــ
المجموع / 21055
رابعا / آخر خطوة
يتم قسمه مجموع نواتج عمليه الضرب (21055) ÷ اجمالى وزن عناصر التركيبه (1000) ليكون الناتج هو نسبه البروتين الموجوده فى التركيبه المطروحه
21055 ÷ 1000 = 21.055 % بروتين هي قيمه البروتين الموجوده فى التركيبه المذكوره بالأعلى
وبنفس الطريقه يتم حساب كل عناصر العلف
(كالسيوم ـ طاقه ـ ليسين ـ ألياف ـ ................)
اتمنى تكون الحسبه واضحه وأن أكون قد وفقت فى الشرح
قد يطرأ فى ذهن أحدكم سؤال
هى التركيبه لازم تكون 1000 كيلوا طن علشان اقدر احسبها ؟
لأ طبعا ـ حضرتك اعمل التركيبه اللى تعجبك أيا كان وزنها حتى ولو 50 كيلوا بس
وامشى على نفس الخطوات المشروحه وبعد ما توصل للمجموع النهائى اقسمه على وزن علفتك (التركيبه اللى انت عملتها)
كده انت بتقول لنفسك
كده بقت سهله ولا اشترى علف ولا اكلف نفسى أنا اروح للعلاف واجمع العناصر اللى انا عايزها واخلطها وأأكلها للأرانب
اسمحلى اقولك انها فكره غير مجديه بكل الصور وعلى كل النواحى
لأكثر من سبب
الأول / الأسعار
عند تصنيع العلف يتم حساب اسعار الخامات على جملتها وهذا اقل من سعر الخامات فى محلات العلافه مثل الذره فى المصنع 2.18 جنيه عند العلاف بـ 2.5 جنيه
وهكذا بالنسبه لباقى الخامات ده غير انك مش هتلاقى كل الخامات دايما
الثانى / القيمه الغذائيه المستفاده من العلف المكبوس
افترض ان امامك الآن كيلوا رده وده حجمه هايكون كبير اما لو تم كبس نفس الكيلوا وضغطه فى شكل اصابع علف حجمه هايبقى اقل طبعا
هو نفسه الكيلوا لم ينقص وزنه ولكن اللى تغير فيه شكله فقط
على افتراض ان الأرنب هياكل ملئ معدته وقتها اكبر استفاده هاتكون على قدر الكميه اللى أكلها لحد ما يملأ معدته
يعنى بالتأكيد هايستفيد غذائيا من الرده المضغوطه او المكبوسه أكثر بكثير من الرده الغير مضغوطه
ثالثا / أكل نيئ أم أكل مطبوخ أيهم اسهل فى الهضم؟
ما يفعله الكبس فى المواد المخلوطه
بعد مرور الخامات داخل المكبس وفى درجه حراره 80 مئويه تقريبا
يخرج من المكبس عباره عن أكل ( مطبوخ ) بدون اى مبالغه فى الكلمه
والتركيبه او الخلطه وهى على هذه الحاله يكون هضمها بالنسبه للأرانب
اسهل بكثير من تقديمها على ما هى عليه
حفظكم الله
وأى استفسار تحت أمر الجميع إن شاء الله
منتدى الأرانب للجميع
أهلا وسهلا بك زائرنا الكريم ، في منتديات الأرانب للجميع .
المرجو منك أن تقوم بتسجـيل الدخول لتقوم بالمشاركة معنا. إن لم يكن لـديك حساب بعـد ، نتشرف بدعوتك لإنشائه بالتسجيل لديـنا . سنكون سعـداء جدا بانضمامك الي اسرة المنتدى . مع تحيات الإدارة
احمد صابرالثلاثاء يونيو 24, 2014 10:53 pm