تربيه وتدريب ذكور الأرانب حصريا على منتدى الأرانب للجميع

الحمد لله الطريقه دى فعلا حصريه وما أظنش أبدا ان حد عملها قبل كده
ازاى أدرب أرنب دكر
والتدريب هنا مش معناه انه يمشى على الحبل مثلا
التدريب هنا معناه تربيه الأرنب من صغره على النشاط والحيويه والقوه علشان يكون عندى فى النهايه أرنب ملوش حل
أول حاجه / انت بتختار الأرنب الذكر عادى جدا زى ما بتختار أى أرنب للإحلال العيون بتلمع والقوام سليم والودان مرفوعه والشعر متماسك والأنف نظيف ومفيش جرب ولا عرقوب وكل اللى انت عارفه
تانى حاجه / تفصل الأرنب فى عين لوحده لحد عمر شهرين أو شهرين ونصف
تالت حاجه / تشيل الأرنب من البطاريه وتوفر ليه مكان على الأرض مساحه متر فى مترين مثلا
وطبعا الأرنب لما يجرى على الأرض حيويته بتزيد ووزنه بيقل لأنه بيتحرك بقدر أكبر مما كان عليه فى البطاريه مع ملاحظه وجود العلف أمامه بشكل دائم
رابع وأهم حاجه / تقديم الخضار للذكر بإنك ترفع الخضار أيا كان برسيم أو خس أو حتى جرجير ـ وعلى فكره الجرجير مفيد لخصوبه ذكور الأرانب ـ عن طريق انك تربط الخضار فى خيط أو دوباره وتعلقها فى أى حاجه أعلى من مستوى الارنب
بحيث انك تجبر الأرنب انه يقف على الأرجل الخفيه فقط لكى يستطيع الوصول للخضار المعلق وبشرط يكون الخضار متعلق فى الهوا يعنى الأرنب لازم علشان يوصل للخضار يقف على رجليه الخلفيه من غير ما يسند على أى حاجه ( رجليه وبس )
خامس حاجه / قبل بلوغ الأرنب لسن البلوغ بحوالى اسبوعين ترجعه للبطاريه تانى وبعدها بأسبوعين عند سن البلوغ تبدأ تشغله هاتشوف أسد مش أرنب ومفيش أنثى بتاخد معاه دقيقتين
طيب الفكره ايه فى الشغلانه دى
الفكره دى انا أخدتها من أرنب كنت بربيه عندى
الأرنب ده كانت رجليه نوعا ما طويله و وكانت الأنثى اللى تعصى عليه كان يلزق فيها ويرفعها من ورا برجليه وبعد كده يقوم بالتلقيح
فحاولت أربى أرنب من صغره على قوه الأرجل الخلفيه والحمد لله كانت النتيجه فوق الممتازه بشويه
وغير كده كان أرنب سريع جدا يعنى لو الأنثى مش قابله كان كفايه عليه جدا انه يخبط برجليه على أرضيه البطاريه علشان تتحرك من مكان لمكان وهى خطوه واحده بس وانتوا عارفين ان الأرنب بيتحرك بخطوات قافزه وأول ما كانت تتحرك خطوه واحده بس كان بيتحرك بسرعه كبيره جدا ويعمل الواجب اللى عليه ولو ما اتحركتش من مكانها يرفعها برجليه ويتصرف
من غير استعمال أستك ولا غيره

ملاحظات الطريقه دى
1ـ تربيه الأرنب فتره شهرين او شهرين ونص من عمره داخل القفص بتساعد انه لما يرجع القفص تانى مايتأثرش تأثير سلبى لأنه اتحبس فى قفص ما هو مولود فى فقص ومتربى فى قفص
2ـ كثره الحركه للأرنب تمنع تكوين أى دهون فيه وخصوصا على الخصيتين وده تأثيره إيجابى جدا على الخصوبه
3ـ قله شراسه الأرنب على الأنثى لأنه مش محتاج يكون شرس هو بيصل لهدفه سواء هى رافضه أو قابله
4ـ زياده خصوبه الأرنب ورغبته الزياده فى الإناث
إيه رأى أهل الخبره وأهل العلم فى المسأله دى