يوميات مربى مبتدىء

نصحت أحد الاعضاء المبتدئين فى المنتدى ان يكون عنده دواء للاسهال وتيراميسين وكالديماج ومستحضر بكتريا ومضاد كوكسيديا وسلفا و .....
رد أخونا الكبير دكتور حسام (الذى لطالما تعلمنا ونتعلم منه الكثير وأكن له كل تقدير) بأن..
هذه الادويه مهلكه للارنب.. ومكلفه بالنسبه لمربى مبتدىء

لذا..

هنفترض الفرضيه التاليه...
عم صلاح طلع معاش.. عنده كام ارنبه بيتسلى فيهم (مربى مبتدىء) لحد ما تختمر الفكره فى دماغه يمكن يتوسع..
عنده 5 أمهات ( فله - سكره - مشمشه - سوسو - توتو ) - أصل أختى بتسمى الحمام بتاعها زى كده - ودكر والوضع عنده خلال شهر ؟؟؟ كالتالى..
فله .. معاها 6 أولاد هيتفطموا خلال الشهر
سكره .. معاها 4 اولاد هيتفطموا ايضا خلال الشهر
مشمشه وسوسو.. هيولدوا خلال الشهر
توتو .. لسه هتولد الشهر اللى جاى
12 نتاج تحت التسمين

احتياجه من الدواء خلال شهر كالتالى..
مرتين سلفا وكوكسى كيور وسترات بوتاسيوم بتكاليف (2*2 جنيه+ 2* 2.5 جنيه + 2*20 قرش) = 9.4 جنيه
هيفطم أولاد فله وسكره.. هيحتاج 5 جرام خميره/ 5لتر ماء بتكاليف 80 قرش
عند سن 40 يوم هيحصنهم بكتيرى اسم للراس بتكاليف 5 جنيه
بعد كام يوم هيدى الواحد ربع سم ايفوماك بتكاليف 75 قرش
مشمشه ولدت 8 رجاله.. عطاها 1 سم تيراميسين ط المفعول تانى يوم الولاده بتكاليف 50 قرش
تالت يوم عطاها 2 سم كالديماج مدر للبن بتكاليف 30 قرش
خامس يوم عطاها 2 سم كالديماج بتكاليف 30 قرش
سوسو ولدت 5 رجاله.. عطاها 1 سم تيراميسين ط المفعول بتكاليف 50 قرش
وبعدين..
عم صلاح راح لعم حسين بتاع العلف لقاه خلص علف اضطر يروح للمحل اللى جنبه يشترى منه عشان معندوش ولا حبه فى البيت رغم ان الراجل التانى رخم شويه بس المهم جاب 5 كيلو لحد ما تفرج
المهم..
الرجاله اللى بيتسمنوا (12) أول يوم أكلوا العلف الجديد .. بالليل راح يبص عليهم لقاهم متنحين.. المهم حطلهم علف تانى من الجديد.. فى الصباح الباكر ..عم صلاح صلى الفجر كالعاده ورجع للارانب وكان الوضع كالتالى..
كل الارانب العلف الجديد قامها زى ماهو.. والرجاله بتوع التسمين متنحين و6عندهم اسهال..
عمل ايه..
عطاهم كل واحد 1سم يونى سلفا (وكرر ده 3 ايام) بتكاليف 270 قرش
وحطلهم كولى تريم على الماء 8سم/10 لتر ماء بتكاليف 160 قرش
يوم 27 فى الشهر .. أخد 6 ارانب من بتوع التسمين وزنهم 7 كيلو وباعهم عند عم جابر الفرارجى اللى ع ناصيه الشارع بسعر 19 للكيلو يعنى بـ 133 جنيه
المهم..
هذه باختصار يوميات مربى مبتدىء فى شهر.. ياترى احتاج علاج بكام فى شهر..
21.85 جنيه
يعنى يا دكتور حسام بواقع 53 قرش للارنب لان عنده 41 راس

تفتكر دا كتيييييييييييييييير ومكلف ومرهق للارانب

الادويه دى يا دكتور زى دوا الاسهال والسخونيه والترجيع والمغص التى يحتفظ بها اى واحد عنده طفل رضيع لمواجهة المشكلات المتكرره
أرجو أن تكون الصوره اتضحت.. وأسف على الاطاله.. وأرجو من الاخوه فى المنتدى تقبل تلك القصه القصيره التى أردت من خلالها توضيح وجهة نظرى.. دون أن تحمل أى معنى للسخريه من أى أحد.
أحبكم جميعا فى الله
أخوكم الصغير
(جميع الحقوق محفوظه)